大角嘴LOST STARS LIVEHOUSE 好酒、美食、靚音樂

唔只一次喺唔同朋友FB & IG見到去咗LOST STARS LIVEHOUSE BAR & EATERY 呢間餐廳，印象唔錯，所以一早save佢做「想去」餐廳之一，環境靚、食物正、有唔少特別cocktail同手工啤，星期五六日仲有本地歌手、唱作人嚟唱live，算係香港少有特色嘅高質餐廳。

自從晚市開返堂食，我就同老公約定，每個月一定最少有一日要搵間好餐廳過吓二人世界，今次去咗LOST STARS LIVEHOUSE BAR & EATERY 呢度，拍吓拖、聽吓歌，食咗我成日想食嘅威靈頓牛柳，再叫咗啲海鮮，chill住飲吓酒、傾吓計，輕輕鬆鬆嘅二人世界，好耐未試過啦。

原來而家逢星期二至四，紅酒、白酒、氣泡酒Free Flow 2小時只係$198起，拍拖或者同班朋友放工一齊 Happy Together最啱。另外Lost Stars x H.K.Lovecraft 嘅<#飲啦孝順>碌柚葉雞尾啤都值得試吓，啤酒用咗碌柚葉、紅棗、杞子、桂圓等慢煮4~12小時提取當中嘅天然香甜味，估唔到咁清新好飲。

我哋點咗韓國松葉蟹膏龍蝦湯，味道非常豐富，因為加咗蟹膏，令到龍蝦湯更香濃惹味，用嚟沾麵包都正！

好多朋友食完都讚呢度嘅西班牙橄欖油泡虎蝦，作為「蝦王」嘅我梗係要試吓。食咗一隻，我已經雙眼發光，虎蝦肉夠結實彈牙已經好正，加上個秘製橄欖油，香辣兼備，隻味好特別，我哋食晒啲蝦之後，用啲homemade butter grilled pain de cristal 麵包索晒碟上剩低嘅油嚟食，真係食到清咗碟。

而今晚嘅主角係個二人前威靈頓牛柳，有人話佢係英國菜，亦有人話係法國菜，呢個誕生於200年前嘅經典傳統菜式，唔係太多餐廳有做，所以知道呢度有得食一定要嚟試試。

點菜時侍應同我哋講話大約等45分鐘，當捧到我哋面前，就發現等待係值得，金黃色嘅酥皮包住嫩紅嘅牛柳，中間一層鴨肝及蘑菇蓉好香滑，令味道口感嘅複雜性大大提升。Lost Stars 呢度仲配合咗幾款唔同醬料，我自己就最鍾意個芫茜蒜粒，加強咗清新帶點辛辣嘅味道，都幾特別。

另外個米蘭烤龍蝦配homemade寬條麵都好值得推介，有成隻龍蝦啖啖肉，配合赤米蟹膏龍蝦汁好惹味，原來個醬汁係用12小時熬製而成，寬條麵做到al dente爽口煙韌有咬口，唔會太硬或太軟，唔怪得呢個係王牌菜式之一啦。

近排嘅生活真係太枯燥乏味，要提醒自己喺平淡中尋找樂趣，雖然今次係平日夜晚放工去未有機會聽Live，但平日有free flow 紅酒、白酒、氣泡酒都唔錯吖。

LOST STARS LIVEHOUSE BAR & EATERY 

地址：大角咀利得街11號利奥坊一期地下506號舖（地圖）

電話：23376728

＝＝＝＝＝＝＝＝＝＝

如果喜歡我的分享，記得讚好我的Facebook專頁「Mrs Co:Lam 凱林家生活」，更快知道更多更好的有趣資訊。

Mrs Co:Lam 凱林家生活

Facebook: www.facebook.com/mrscolam

Instagram: www.instagram.com/mrscolam

Email: hello@mrscolam.com

Website: www.mrscolam.com