「結婚即係被控制，佢話行東你唔好行西。」

佢覺得自己被丈夫控制係正常事，順從另一半就好似肚餓就要食飯咁自然。朋友問佢點解咁講，佢認真答：「因為佢係男人囉，你唔可以質疑一個男人。」

我喺自己嘅社交圈子裡好耐冇聽過咁父權嘅想法，雖然久唔久都有女仔朋友講「男人就係人渣」，但好多時都係Girls' talk 呻兩句嗰陣講，我笑住補充「女人都可以係人渣」，跟住大家都會講自己有幾人渣。

講返頭先嗰番言論，佢話其實好多已婚女人都有呢種諗法，但只係between women，因為呢個係佢地嘅心裡明白嘅survival skill。

佢兩年前啱啱生咗個仔，由餵奶講到報play group，佢話佢根本唔鍾意小朋友，無奈佢老公識佢開始就講明要生一仔一女，講到疫情後想去日本定台灣，佢就話連長州都未必去到。

佢話：「個仔一喊我就煩，次次都要attention，有時都唔想理，直接送去佢奶奶度，等佢地湊飽佢。」

當順從係必然時，生唔生仔都冇得自己選擇。冇人同過佢講有其他選擇，當一個人認為自己冇發言權、對自己身體亦冇任何控制權，通常都係好耐以前就被洗腦或一直被無視。

其中一個朋友講起佢結婚後只會儲錢投資同旅行，佢就話「證明你根本未準備好結婚。」聽佢講點做人母就感覺到佢完全唔享受，但佢都係跼住做，因為順從男人係妻子天職亦係佢生存嘅方式。

我無法忍受呢種心態，雖然佢仍然年輕，但呢種論調真係好落後。我唔想成為呢種妻子，更唔想成為呢種母親。

如果一個人嘅生命圍繞住「迎合、順從他人」，可能佢嘅成長環境都係教導佢咁做，可能一直都被迫咁做，因為有其他選擇就等如精神錯亂或褻瀆宗教、生命意義、家庭系統。好多人以為唔聽話就一定係壞，順從嘅反面就係坐監、販毒、濫交、信奉邪教。

但當佢地見到其他人過緊佢想要嘅生活，並且健康和快樂時，佢地完全無法接受，繼續接受同恭迎更多嘅約束同管制。