孖寶第一次去游水 帶BB游水Check list，到底BB游水要注意咩?

Caydan Ramsey的下水禮，今次係孖寶第一次正式去泳池，之前玩Baby Spa的唔計…..呵呵! 今次小試牛刀，去左屋企會所的泳池。

未去之前孖媽我都有好多顧慮，又諗泳池的水含氯，會唔會傷害佢地的skin? 又有諗過BBs係水度poo poo點搞? 咁樣我會好唔好意思的啦~又有諗到如果BBs嗆到水點算，你知呢媽咪嘛，係會諗得比較多~hehe

咁我當然係會同孖爸商量啦，佢好快咁send左好多游泳對嬰兒的好處相關的link過來KO我，咩促進BB食慾、強化免疫系統，降低過敏現象、增加親子之間的互動等等…….即時徹底咁KO左我，不過其實我都同意既咩都應該試下，不過要安全。於是我就整理下思緒，諗清楚要帶咩同注意咩，以下將我今次的經驗整理出來同大家分享：

BB游水Check list

• 一個安全的水泡，咁我當當然係帶兩個比孖寶一人一個啦
• 防曬用品 ，一定要搽
• 帶d孖寶平時食開的有機小食餅乾，引佢地坐定定一陣， 等我地可以有d時間執野 
• 毛巾，至少帶兩條比BBs， 一條帶出泳池用作上水時保暖; 而沖完涼抺身就用另外一條.  咁我當然係帶左4條比孖寶
• BBs游水尿片，我係Aeon買左Huggies的
• 防蚊用品，一早要用定，未落水之前搽。 大家都知今年幾多蚊既啦
• 仲要一件泳衣，提提大家最好揀一件緊身的泳衣，如果真係好曬可以用埋防曬功能的泳衣。 仲有，怕BBs肚仔著涼，最好就著連身的泳衣啦

BB游水注意事項

• 唔好食得太飽 
• 訓夠先落水游泳
• 唔好游咁耐，最多一小時 。今次孖寶第一次游水，比佢地玩左30分鐘多dd咁上下的時間
• 陪同BBs落水的大人最好著件T恤落水，因為BBs係水中會反射性咁搵野抓，如果大人身上有件T恤就可以比BBs一驚個陣有野抓。 比BBs多d安全感
• 如果好似我地咁係去泳池，落水之前可以先檢視一下泳池環境，水質：我同孖爸目視過d水非常清澈，同埋表面無明顯的浮油物…..haha

咁一切準備就緒，可以開始游水喇!! 

我首先比佢地係游泳坐左一陣，睇下同適應下環境，之後就放佢地入水泡啦。

其實我無expect佢落水會係好開心，因為之前幾次Baby Spa佢地兩兄弟都係好calm。

我同孖爸都係雙手推住佢地個水泡沿住個泳池同佢地行下，有一段小時間我捉住兩個，孖爸自己去游咗一陣。

Ramsey細佬仔好似覺得好正咁，起初有係咁踢水，之後可能係水度浮下浮下好舒服，好似好想訓咁。而Cayday哥哥keep住同平時一樣都係咁老定，好似好有大將之風咁....哈哈

我地就咁樣游咗30分鐘，跟住俾孖寶上水休息。

唔知孖爸係太耐無游水，定係年紀大左好多，佢話游咗一陣已經好累了 。