新舊菜式都有@店小二

終於夾到時間去探搬咗嚟呢區嘅食力組組員，送上新居禮物後，屋主帶我去呢度食呢餐入伙酒。

最好就訂位，我地因為早到先仲有位。入到去見牆上掛上菜牌，有d仲有埋相作參考，菜式種類懷舊/創新都見到。

想最快有野食，加上仲係炎熱天氣，叫冷盤小食是常識吧。呢客味付蘋果醋海蜇頭就成為今晚打頭陣之選。

估唔到份量都幾多，材料除咗有海蜇頭，仲有海葡萄及黑木耳，全部都係爽脆之物，再加上帶甜酸度嘅蘋果醋，令人涼感又開胃。

呢度都幾多以海產入饌嘅菜式，最傳統大路嘅有蒜蓉素翅蒸扇貝。

大路中有亮點嘅由素翅代替用開嘅粉絲，入口帶點嚼口; 而隻扇貝肉正常厚度，加埋金銀蒜及豉油，一啖食晒都幾滿足。

睇個餸名黃金蝦兩食，諗緊點兩食法。原來係黃金蝦，仲有黃咖喱配牛⻆酥。

先食黃金蝦，即係以咸蛋黃包住隻蝦，唔會食到一口油，只會食到惹味嘅咸蛋黃，蝦肉都算彈牙同唔細隻。

個黃咖喱入面係蔬菜，香而唔辣

食法當然係用牛角酥黎沾咖喱汁食啦，幾好味。

叫個可以送白飯嘅，就係呢客鷄松菇爆黃鱔片。

鷄松菇都係第一次聽同食，口感比較爽口; 而黃鱔片略帶點厚度，加埋色彩鮮艷嘅甜椒及薑蔥芹一齊快炒，香味四出及帶來多種口感。

呢餐人均消費大約三百幾元(只收現金/轉數快)，菜式之配搭見到心思，下次同大班朋友黎食就可以試下其他菜式。

#sheblog #foodie #foodiehk