幫小朋友買自願醫保要注意啲咩?

1. 墊底費
   「墊底費」又叫「自付費」,係指投保人向保險公司索償時要自己先付嘅費用,保險公司先會按保單條款賠償超出自付費嘅餘額。例如申索賠償$20,000,而自付費係$15,000,投保人要自己負責$15,000,餘下$5,000先由保險公司支付。

不過,小朋友因為經常入院,所以家長可以揀無「墊底費」嘅自願醫保。一次住院費用,可能足以抵銷該年嘅小朋友醫療保險保費,仲有淨。

2. 每個項目設賠償上限 vs 全數賠償
   標準計劃,以及唔少靈活計劃,都為每個項目設賠償上限,例如病房及膳食、主診醫生巡房費、專科醫生費等。當有關費用超出賠償上限,餘額就要由投保人自己承擔。

反之,「全數賠償」靈活計劃就唔會就每個項目設賠償上限,方便計數,但每年及終身保障上限等條款仍有限制。

3. 住房級別
   小朋友醫保一般會分為普通大房、半私家房同私家房三個級別。小朋友所接受嘅治療唔會因住房級別而有所不同。不過,如果家長想小朋友B避免染上傳染病,可以考慮人數較少嘅半私家房,甚至私家房。

4. 陪床費
   子女留醫,父母擔心。部分家長可能會選擇留喺病房陪伴子女到第二日,因此會產生陪床費。不過,唔一定所有小朋友保險都包括陪床費,家長要留意。

5. 自願醫保保費可以扣稅
保單持有人可以就自願醫保保費申請稅務扣除,每個課稅年度每名受保人嘅最高保費扣除額係8,000港元。除咗小朋友之外,受保人仲包括配偶、納稅人或佢哋配偶嘅祖父母、外祖父母、父母同兄弟姐妹。