[飲飲食食] $66快餐倒不如『傳統西餐廳』
- by Twinkle C
- March 26, 2014
[飲飲食食]
$66 快餐倒不如『傳統西餐廳』
$66 快餐倒不如『傳統西餐廳』
.
.
.
.
已經好耐無寫飲食文，因為最近『空餘』嘅時間唔多，午餐一係食包，一係就食快餐，根本就無時間享受。
直到最近，到了灣仔的『明寶石餐廳』享受了一個香港傳統的西餐廳午餐。
我所說的傳統『西餐廳』，就係80年代式，一個套餐中會有羅宋湯，甜餐包，牛油，一杯飲品，一個主菜，然後餐廳擺位都有刀叉匙個種。
.
.
今時今日，到一D港式茶餐廳，食個碟頭飯，加杯凍飲，埋單起碼都要$50-$70，視乎你食咩飯~
.
.
但我呢一日，去到『明寶石餐廳』，食哂成個餐，連加一凍飲，都係 $66！
食快餐，倒不如來個『西餐』！
我想同大家介紹呢間明寶石『傳統西餐廳』，係因為佢招呼週到，全部員工都好有禮貌，然後擺位整齊，已經吸引左我擺低手上嘅工作，認認真真去享受呢一餐。
.
.
先來一個甜餐包 +牛油，再飲一個『有菜味』而且熱嘅羅宋湯，一杯『夠凍』嘅咖啡，係呀，唔知幾時開始，去茶餐廳要飲一杯『夠凍嘅凍飲』似乎係不可能的事。
一個午餐，其實無咩要求，只係想個飯熱，主菜熱，員工有禮貌，唔好催我走，地方乾淨D... ...
但好似已經好耐冇遇過，但係呢度，我感覺到員工的禮貌，食物應有的新鮮同熱辣辣上枱，最重要，我叫個『咖哩牛腩飯』唔止有牛腩，仲有 3件薯仔，至少 4, 5件大牛腩同牛筋！
.
.
唔係講笑，呢個份量未係算超級多，但我好肯定佢真係唔算少~
.
呢個咖哩牛腩飯，係真係有咖哩味，唔係一D淨係得『咖哩色』而冇真正『咖哩味』嘅汁，總括，如果下次，我再去灣仔，我都一定會再去呢間餐廳，$66，買個真誠招呼，買個好味甜餐包，買個咖哩汁，買杯凍咖啡... ... ... ...
當我走去快餐店，食個四寶飯加凍杯都要 $5X 蚊時，我就真係覺得『明寶石餐廳』物超所值！
.
如果連一間無招呼無『享受』嘅快餐，都話因物價上漲而不斷加價時，『明寶石餐廳』呢一類小店又如何生存呢?
我希望『明寶石餐廳』各員工可以繼續以真誠的心，為香港市民提供有水準的『傳統西餐廳』服務，一個 $66 的午餐，帶給我45分鐘的享受，多謝~
.
明寶石餐廳︰灣仔譚臣道98號運盛大廈地下B舖 (灣仔MTR EXIT A3 行 2分鐘)
電話︰2834 4887
.
.
.